Sarangani Province- Naghugyaw karon ang probinsya sa Sarangani tungod kay sa pinakaunang higayon gideklara nga Top 6 Most Competitive Province ang Sarangani sa tibuok nasud Pilipinas, taliwala sa otsyentay-uno (81) ka probinsya.
Gihatag ang award sa National Competitiveness Council niagi lamang adlaw nga Miyerkules didto sa Philippine International Convention Center kon P.I.C.C sa Pasay City.
Dako ang gilupad sa ranking sa Sarangani tungod kay gikan sa pagka-Top 24 niaging tuig Dos Mil Kinse (2015) og Top 23 niaging tuig Dos Mil Dise-sais (2016), karong tuiga ang gipasidunggan isip Top 6 entiro Pilipinas.
Dakong kalampusan kini sa Sulong Sarangani flagship program nga upat (4) katuig pa lang nga nanganaw-kanaw sa Sarangani Province gipangunahan ni Governor Steve Chiongbian Solon katugbang sila Senador Manny Pacquiao, Congressman Ruel Pacquiao, Vice Governor Elmer De Peralta, mga board member og ang pito ka mga mayor.
Segun ni Governor Solon, walay laing formula iyang ginasundan kundili ang pag-angkla sa tanang mga programa, proyekto og aktibidad ngadto sa gihandum niini nga “God-centered Prosperity.” Ang Labaw nga Makagagahum matud pa ang hinungdan sa tanang mga grasya og bendisyon karon sa Sarangani. Gihiusa sa Ginoo ang tanang katawhan rason nga gikan sa nasyonal paingon sa lebel sa purok, tanan ang nagtinabangay alang sa kalinaw og kalambuan.
Upat (4) ang nahimong basehan sa gihatag nga award: Economic Dynamism, Government Efficiency, Disaster Resiliency, og Infrastructure. Sayud ang kadaghanan nga napuno og imprastraktura ang Sarangani og daghan pa ang binilyon nga muabutay nga proyekto sa tabang ni Pangulong Rodrigo Duterte. Daghan usab ang nakadayig tungod kay transparent ang pagpadagan sa Kapitolyo, matag pondo ang ginapabalo. Business-friendly pud ang mga palisiya sa mga munisipyo, paspas ang pag-atiman ngadto sa mga gusto mulagak sa ilang pohonan. Og gisaluduhan ang disaster resiliency program sa Sarangani; bisan dili agianan sa bagyo apan lig-on ang disaster preparedness and responses dili mabalaka ang mga investor og negosyante.
Sa bahin ni Maam Hazel Hautea, ang bag-ong provincial director sa Department of Trade and Industry kon DTI Sarangani, iyang gibutyag nga ang kadaugan ang nagpamatuod lamang nga dako na ang nahimong kausaban sa kahimtang sa Sarangani. Kung gibansagan ang Sarangani nga apil sa pobreng probinsya apan nakita karon nga gideklara kining Top 6 Most Competitive Province sa tibuok Pilipinas. ( OFFICE OF THE GOVERNOR- SARANGANI PROVINCE)
