Laing health partner napud ang nibisita sa Sarangani Province niagi lang semana gikan Agosto 29 paingon Agosto 30 nipahigayon sila sa ilang libreng dental community outreach pinaagi kana sa naila nga kahugpungan gitawag nga DHNAD (de-nad) kon Department of Health National Association of Dentists.
Ang Department of Health National Association of Dentists ang partner sa DOH ug sa P.D.A. o Philippine Dental Association sa pagpakaylap sa oral health program sa tibuok Pilipinas. Sila ang mga dentista ug dental aid nga sweldado sa gobyerno nagtrabaho sila sa DOH, LGU ug uban pang government agencies sa entiro nasud. Affiliated sila sa PDA isip ilang mother organization.
Dili lang pagpang-ibot sa ngipon ang ilang ginabuhat kundili ang pagbutang usab og flouride ug ang paghinlo sa mga ngipon aron dili madaot apil na ang pagbutang og pasta. Gilibot nila ang Pilipinas aron makahatag og dungag impormasyon ug ang padayon nga kampanya nga protektahan ang mga ngipon pinaagi sa pag-toothbrush. Gituyo nila nga dili lang mangibot og ngipon inay anaa pay laing dental services aron walaon sa huna-huna sa mga bata ang kahadlok kung makakitag dentista.
Swerte ang Sarangani Province tungod kay sa tibuok Mindanao, Sarangani ang una nilang gipili gitawag ang ilang dental program nga “Bayanihan ni Dok.” Nakapahigayon na matud pa silag dental mission sa Luzon ug karong panahuna, Mindanao ang ilang giadtuan.
Unang naka-benipisyo sa ilang programa ang mga bata sa day care ug elementarya sa Gasi Elementary School, bukid nga barangay na kini sa lungsod sa Kiamba gipuy-an kasagaran sa mga lumad, kauban si Kiamba Municipal Councilor ug usa pud ka dentista nga si Kagawad Bobot Martinez. Pagkasunod adlaw, naka-benipisyo pud ang mga kabataan sa Malapatan National High School.
Segun ni Doktora Mary Ann Battad, ang national president sa DOH National Association of Dentists, wala sila nasipyat sa pagpili sa probinsya sa Sarangani nga maoy una nilang beneficiary area sa Mindanao tungod matud pa adunay nindot nga pagpadagan sa lokal nga gobyerno ug may maayong lideres. “Best working partner” matud pa nila ang Sarangani. Nagkita matud pa sila ni Governor Solon ug ilang nakita nga hands-on kini sa pagpatuman sa mga programa.
Tayming usab ang higayon tungod kay vice president for Mindanao sa ilang grupo ang municipal dentist sa munisipyo sa Malapatan nga si Doktora Zamrod Remitar. Bag-o lang nakadawat og award ang LGU Malapatan giila sila sa Department of Health nga maoy nag-inusarang Orally Fit Community sa tibuok Region 12. Gideklara pud sa DOH nga Orally Fit Day Care Center ang Malinawon Day Care Center sa Barangay Lun Padidu, Malapatan. Kini nga duha (2) kabuok award ang tulo (3) ka tuig nang ginadawat sa Malapatan, grandslam champion na sila, timaan nga maayo nilang gipatuman ang dental program.
Nagpasalamat na lamang si Board Member Irish Arnado-Benola, ang chairman sa committee on health isip sya usa ka registered nurse, sa pagpili sa Sarangani Province nga maoy pilot area, kauban si Sarangani Provincial Dentist Doktor Gaudencio Mendoza. Maningkamot matud pa sila nga mga board member ug si Vice Governor Elmer De Peralta kuyog sila Senador Manny ug Congressman Ruel Pacquiao nga suportahan sa mga palisiya ang Sulong Kalusugan program ni Governor Solon.
