Sarangani Province—Kampante karon si Director Gil Cesario Castro, ang regional director sa Philippine Drug Enforcement Agency kon PDEA Region 12, nga mamahimong pinakauna nga ma-deklara nga drug-cleared province ang lalawigan sa Sarangani sa tibuok Rehiyon Dose.
Atol sa Joint Meeting sa Sarangani P.P.O.C. og PADAC (Provincial Peace and Order Council) og Provincial Anti-Drug Abuse Council niaging adlaw nga Miyerkules, gibutyag ni Director Castro nga sa ilang gibuhat karon nga mga lakang, positibo kini nga ang Sarangani Province ang mauna nga ma-deklara nga drug-free sa entiro rehiyon.
Inadlaw na lang matud pa ang iyang giihap aron maka-deklara. Kahibaluan nga ang mga munisipyo na lang sa MAKIMA kon Maasim, Kiamba og Maitum ang wala pa ma-deklara, deklarado na ang Glan, Malungon, Malapatan og Alabel.
Sa maong regular joint meeting gibutyag sa PDEA Regional Director nga pinaagi sa hiniusang pagpaningkamot sa ilang buhatan og sa mga kasundaluhan og kapulisan, sa 27th IB, 1002nd Brigade og Sarangani Provincial Police Office, anaa na sa tunga sa kilo nga shabu ang kinatibuk-ang nakumpiska sa Sarangani mukantidad og P2.5 Milyon ka pesos, og kini ang madugangan pa sa musunod nga operasyon. Anaa sa baynte (20) kabuok mga high-value target ang nangadakpan.
Apan ang gihangyo lang matud pa ni Governor Solon ngadto kaniya isip PDEA Director mao nga tagaan og hustisya ang matag operasyon, buot pasabot magpahigayon og pagpanikop nga limpyo og ligdong ang intensyon og binuhatan, og sikupon kadtong tinud-anay nga may kasupakan og kasal-anan. (News from: Governor’s Office of Sarangani Province)
