General santos City—Andam matud pa sa unsa mang pagahimuong imbestigasyon si Police Chief Inspector Manuel Ryan Lim, chief of police sa Glan Municipal Police Station may kalabutan sa pagpusil patay niini sa suspek nga anaa sa ilahang kostudiya o sa sulod mismo sa Glan PNP kaniadtong milabayng mga semana.
Kini ang gikumperma usab ni Police Chief Inspector Neil Wadingan, ang tigpamaba sa Sarangani Police Provincial Office sa oras nga mupasaka og reklamo ang pamilya sa napatay nga si Teddy Otadora nga taga Barangay Labangal, GenSan.
Matud pa sa maong opisyal nga nga andan si PCI Lim nga tubagon ang unsa mang pangutana sa mga kabanay sa napatay. Dugang pa ni Wadingan nga self defense lamang ang gihimo ni Police Inspector Lim human giilog sa suspek ang armas sa iyahang imbestigador samtang ginaimbestigahan kini sulod sa presento og naabtan na lamang niini nga naglayog na silang PO2 Herbert Alinsagay og ang suspek nga si Otadora sa armas rason nga gipusil na lamang niini ang suspek sa tangkugo aron di sila ang mapusilan.
Kahibaluan nga Si Teddy Otadora ang maoy gitudlong suspek sa pagkawat sa usa ka Honda XR 200 sa may Baulaong Terminal, GenSan og gidala sa mga suspek ngadto sa Barangay Lagimit, Glan, Sarangani aron didto unta ibaligya apan nabulabog lamang sa mga barangay officials rason nga gipanghold ang mga suspek.
Hinuon sa kasamtangan wala pay pormal nga reklamo ang mga kabanay sa napatay nga gipasaka batok sa Station Commander sa Glan PNP.
