Sarangani Province–Andam na ang probinsya sa Sarangani sa paghinumdom sa Kalag-Kalag sa atong mga kaigsoonang Kristyano hilabi na sa simbahang Katoliko. Segun ni Police Col. Joffel Remudaro, ang deputy provincial director for operation sa Sarangani Provincial Police Office, gikan kagahapon Oktube 30, nagsugod na sila sa pag-deploy sa mga kapulisan sa dise-sais (16) kabuok dagkong mga sementeryo sa entiro Sarangani Province subay sa ilang security plan alang sa Undas 2019.
May namuntar na matud pa silang Police Assistance Desk sa matag dagkong sam-ang kauban ang mga force multiplier. May mubantay pud sa mga vital area, sama sa terminal, palengke ug ubang pang mataong lugar. Iyang gipasalamatan ang koordinasyon sa LGU ug sa uban pang ahensya sa gobyerno aron dungan nga muhatag og seguridad sa mga katawhan, sama sa mga local disaster risk reduction management team. Nidungag usab matud pa og setenta (70) ka PNP personnel ang Police Regional Office/PRO 12 aron mu-augment sa naka-deploy nga 500 kabuok PNP Sarangani.
Subling nagpahimangno si Col. Remudaro nga una muadto sa mga sementeryo, siguruhon nga nasiraduan og sakto ang mga panimalay ug natanggal na ang mga saksakan aron maiwasan ang kawat ug ang sunog. Gibawalan nga mudala og mga armas ug mahait nga mga butang sulod sa mga sam-ang, lakip na ang pagdala og mga ilimnong makahubog nga dugay na matud pang gidid-an sa ilang Oplan Kapanalig.
Adunay mga kapulisan nga makita sa mga kadalanan aron muhatag og road security, maong apil ang sakyanan matud pa nga ihan-ay nang daan para dili na malisdan sa mga pagrikisa ug sa pag-parking.
Gibutyag ni Remudaro nga magpabilin lang nga magbinantayon samtang gitamod ang duha (2) ka adlaw nga Kalag-Kalag. Bisan sila matud pa sa PNP Sarangani ang nakatutok usab sa kalamidad tungod kay aduna silay search and rescue team. Gani, human matud pa sa nahitabo nga linog niaging adlaw, paspas nga gi-activate ni Sarangani PNP Provincial Director Col. Lex Ephraim Gurat ang disaster incident management task group sa PNP Sarangani.
Gilayon matud pa nilang gisuta pinaagi sa pito (7) ka municipal police station kung adunay napagan sa kusog nga pagtay-og. May pito (7) ka mga indibidwal sa lungsod sa Malungon ang naapektuhan apan minor injury ug lipong lang matud pa ang nahiaguman.
Balik-eskwela na ang mga kabataan sa Sarangani Province karong adlawa (except Malungon) human nga gi-suspenso ang ilang klase hangtud kagahapong adlawa partikularminte sa Maasim, Alabel, Malapatan, Glan ug Malungon. Dili usab sila magdugay sa ilang mga eskwelahan tungod may deklarasyon na si Pangulong Rodrigo Duterte ug gipatuman ni Governor Steve Chiongbian Solon nga half-day lang ang mga opisina sa gobyerno karong adlawa aron maka-prepara sa Kalag-Kalag, sa pagsuporta nila Senador Manny ug Congressman Ruel Pacquiao, Sangguniang Panlalawian ug mga mayores.
Mapasalamaton na lamang si Rene Punzalan, ang labaw sa PDRRMO Sarangani ilalum sa opisina ni Governor Solon, nga walay dakong damyos ug casualty sa Sarangani gumikan sa maong kusog nga linog nga nitala og 6.6 magnitude niaging Martes Oktubre 29 ug 6.3 magnitude niaging Oktubre 16.
Gipaklaro sa PDRRMO Sarangani human gikumpirma sa Office of Civil Defense ug sa PHIVOLCS nga walay tsunami alert tungod ang epicenter ang didto ra gihapon sa Tulunan, North Cotabato, layo ra sa dagat, apan magpabilin sa gihapon nga magbinantayon tungod sa masinatian nga mga aftershock.
Ccto:
