Dili ra sila DENR Assistant Secretary Corazon Davis og mga international charity organization ang nibisita sa probinsya sa Sarangani unang bulan pa lang karong tuiga 2019 kundili niduaw usab ang National Secretariat sa ECCD Council kon Early Childhood Care and Development Council tungod usa ang Sarangani sa lima (5) ka lugar sa Pilipinas nga ilang gipili aron basihan nga makamugna og National Strategic Plan sa ECCD maoy giya sa nasyonal nga panggamhanan sa musunod nga napulo (10) katuig hangtud tuig 2030.
Segun ni Ms. Katrina Libron, ang planning officer sa ECCD Council Secretariat, ilang gibisita ang Muntinlupa City, Davao City, Quezon Province, Catbalogan City sa Samar, og ang Sarangani Province sa pagpanguna ni Governor Steve Chiongbian Solon, aron makakuhag silag aktwal nga impormasyon og mga maayong pagtulun-an sa nahimong nindot nga implementasyon sa ECCD.
Ang programa sa ECCD kon Early Childhood Care and Development ang gipatuman aron tutukan unang-una ang early childhood education sa mga bata pinaagi sa pagpabarog sa mga day care centers. Tungod sa K to 12 basic education curriculum sa Department of Education, ang sais (6) anyos karon ang anaa na sa Grade 1, maong gipakusgan pa ang ECCD sa mga kabataan nga wala pa kaabot sa maong pangidaron.
Sa datus sa ECCD National Council, usa ang Sarangani nga nailhan nga adunay maayong pagpatuman sa ECCD services dili ra sa early education sa mga bata kundili apil na sa ilang panginahanglan sa panglawas, nutrisyon og social protection. Gawas pa niini, naila usab ang Sarangani nga adunay daghang mga NGOs kon non-government organization ang ga-ayuda sa kaayuhan sa mga kabataan.
