Gibutyag ni Police Regional Office kon PRO 12 Deputy Regional Director for Administration General Ulysses Caton nga timaan lamang matud pa nga malinawon ang lungsod sa Malapatan og ang tibuok Sarangani Province tungod sa presensya sa mga investor.
Nahitabo kini atol sa pag-abli sa bag-o og modernong shrimp farm sa Barangay Tuyan, Malapatan, Sarangani Province niaging mga adlaw gitawag nga Dynamic Team Aqua Ventures nga gipanag-iyahan sa Pamilyang Teng nga nanag-iya usab sa Greanleaf Hotel og uban pang pamatigayon sa rehiyon.
Kadaugan matud pa nila sa kapulisan ang pagsulod sa mga investment nagpamatuod nga stable ang peace and order sa lugar. Nanghinaot na lamang ang opisyal nga daghan pang mububo sa ilang kapital dili lang sa Sarangani kundili sa ubang parte sa Rehiyon Dose. Gitambungan usab ang maong seremonyas ni PRO 12 Regional Director General Eliseo Rasco.
Sa habig ni Governor Steve Chiongbian Solon, iyang gipamahayag nga abri ang Sarangani Province sa buot mubutang sa ilang mga negosyo tungod kay sigurado man matud pa nga makadala kinig trabaho sa mga residente.
Aminado kini nga dakog papel sa kalambuan ang pribadong sektor maong iyang gipaniguro nga anaa ang lokal nga panggamhanan kauban sila Senador Manny og Congressman Ruel Pacquiao, Vice Governor Elmer De Peralta, tanang board member og mga mayores, andam muhatag sa “enabling environment” aron sila magmalampuson. Naka-posisyon ang Sarangani Province karon nga maoy mahimong shrimp o “pasayan capital” sa Region 12.
