Tulo (3) ka mga dagkong MOA o Memorandum of Agreement ang bag-uhay lang gi-aprobahan sa Sangguniang Panlalawigan sa probinsya sa Sarangani sa pagpanguna nila Vice Governor Elmer De Peralta ug sa tanang board member nga naghatag og pagtugot kang Governor Steve Chiongbian Solon aron dawaton ang sunod-sunod nga ayudang pinansyal gikan sa Department of Health ug sa mga partner sa pribadong sektor walay laing tumong kundili nga mapakusgan pa ang programa sa panglawas.
Unang kasabutan mao ang tali sa Department of Health Region 12 ilalum sa pamunuan ni Regional Director Aristides Tan, aron mahatag na sa Sarangani ang dili muubos P1.4 Milyon ka pesos nga pondo maka-benipisyo ang mga kabus nga pasyente nga ma-hospital sulod sa Sarangani Provincial Hospital ug sa mga municipal hospital, kadtong dili na gyud makabayad sa mga balayrunon. Gitawag kini nga programa sa DOH nga MAIP (ma-ip) kon Medical Assistance to Indigent Patients. Wala pay apil niini ang regular nga gipanghatag nga Philhealth gikan sa Kapitolyo ug sa mga munisipyo sa mga mayores kung ma-admit, ug ang MOA (mo-wa) nga 70% sa hospital bill ug AICS (ah-iks) nga dili muubos Singko Mil (P5K) ka pesos kung masulod sa mga hospital sa Gensan.
Unang maka-benipisyo nga municipal hospital sa kini nga MAIP program mao ang Kiamba Municipal Hospital nga usa na ka Level 1 hospital, ug ang Maitum Municipal Hospital. Maka-benipisyo pud ang Glan Municipal Hospital ug Malungon Municipal Hospital, una nang nakadawat ang Maasim Municipal Hospital.
Segun ni Doctor Arvin Alejandro, ang provincial health officer, pasiuna pa lang matud pa kini nga P1.4 Milyon ka pesos ug padayon pang makaangkon og dungag pondo ang Sarangani gikan sa DOH alang sa maong programa nga maka-benipisyo ang mga wala gayuy ikasarang sa pagbayad sa hospital. Usa sa naglihok nga matagaan ang Sarangani Province sa pondo sa MAIP mao si Senador Sonny Angara sa pagsuporta nila Senador Manny ug Congressman Ruel Pacquiao.
Ikaduhang MOA mao ang tali gihapon sa Department of Health Region 12 aron mahatag na ang One Hundred Thousand Pesos (P100K) nga premyo tungod nakakuha og award ang Sarangani gitawag nga Purple Ribbon Award may kalabutan sa maayong pagpatuman sa family planning, responsible parenthood ug reproductive health. Gamiton kini nga pondo alang sa padayong kalambuan sa mga kababaihan ug mga inahan sa tibuok Sarangani Province.
Ug ang ikatulong kasabutan mao ang kabahin sa MOA tali sa dakong kumpanya nga Colgate-Palmolive Philippines Incorporated. Segun ni Dr. Laudencio Mendoza, ang provincial dentist, sa tibuok Pilipinas, usa ka gatos (100) lang ka mga lugar ang gipili sa iladong kumpanya nga Colgate-Palmolive Philippines aron mahimong benipisyaryo sa ilang anti-cavity dental program gitawag nga Bright Smiles, Bright Futures/BSBF Program, ug swerte nga naapil ang probinsya sa Sarangani.
Usa ka tuig kining ipatuman sa entiro Sarangani kung diin usa ka libo (1K) ka mga kabataan ang maka-benipisyo sa kini nga programa nga makapalig-on ug makapaatiman sa ilang mga ngipon. Apil nga maka-benipisyo ang mga ginikanan.
Walay laing nalitok nga pulong si Board Member Irish Arnado-Beñola, ang chairperson sa SP Committee on Health, ug si Board Member Joseph Calanao, ang chairman sa SP Committee on Legal Matters, kundili pasalamatan ang tanang partner sa Provincial Government sa Sarangani. Magpabilin matud pa nga naka-alalay alang sa mga policy support ang Sangguniang Panlalawigan sa mga kalihukan sa Sulong Kalusugan program ni Governor Solon.
