Sarangani Province–Pormal nang gidawat kagahapong adlawa, Miyerkules, ang award nga nag-ila sa probinsya sa Sarangani nga Rank 5 sa entiro Pilipinas sa year 2018 Annual Competitiveness Index. Tungod sa maong award, gawas sa national ranking, giila na karon ang Sarangani nga Number 2 Most Competitive Province sa Mindanao, og sa Rehiyon Dose anaa na kini sa unang pwesto.
Nagkauyon sila DTI Assistant Secretary Dempha Du-Naga og DTI Provincial Director Ethel Gumana nga tungod sa maayong liderato, katakus og pagtinabangay sa mga local officials og sa pagsuporta sa mga katawhan, paspas ang nahimong improvement sa Sarangani. Maong ilang gidayig ang pagdumala sa mga opisyales sa pagpanguna ni Sarangani Governor Steve Chiongbian Solon.
Bisan si Pangulong Rodrigo Duterte ang naka-obserba sa kalambuan sa Sarangani Province. Sa iyang pakigpulong atubangan sa mga kasundaluhan og mga kanhing rebelde ato lang Agosto 23 atol sa ika-dose (12) nga anibersaryo sa AFP Eastern Mindanao Command sa Davao City, gibutyag sa Presidente nga nagginukdanay matud pa sa kalambuan ang Davao og Sarangani.
Apil pud nga gitagaan og award kagahapon ang nasulod sa Top 50 nga mga munisipyo. Rank 28 ang LGU Maasim taliwala nga adunay 489 kabuok first og second class municipalities sa Pilipinas, ika-32 ang Malungon, og ika-34 ang Alabel. Giila usab nga Best Provincial Competitiveness Coordinator sa tibuok Region 12 ang investment officer ni Governor Solon nga si Ms. Melbie Guiang-Daguro.
