Maayong pagsaulog kanatong tanan sa Kapaskuhan. Padayon lang ang panawagan sa opisina ni Doctor Arvin Alejandro sa Provincial Health Office ilalum sa Sulong Kalusugan program ni Governor Steve Chiongbian Solon, kauban ang PNP Sarangani, sa pagsuporta usab nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores, nga bawal magpabuto sa mga gi-bawal nga pabuto karong panahon sa Pasko hilabi na sa pagsugat sa bag-ong tuig 2020. Ang gitugutan lang sa balaod mao ang fireworks.
Sa talaan sa PHO Sarangani, usa (1) lang ka tao niaging tuig ang natala nga nabuthan og firecrackers, ug naglaum si Dr. Alejandro nga wala na gyuy mabuthan nga taga-Sarangani Province karong tuiga.
Ang PNP Sarangani usab sa liderato ni Provincial Director Col. Lex Ephraim Gurat ang nanawagan sa mga Sarangan pinaagi sa tigpamaba nga si Lt. Col. Teody Condesa, nga padayong magbinantayon sa palibot gumikan sa pagpamomba ato lang Dominggo sa gabii sa tulo (3) ka lugar, didto nahitabo sa Cotabato City, Libungan sa North Cotabato ug sa Upi, Maguindanao nga gikaangol sa baynte-dos (22) na ka mga indibidwal apil pa mga myembro sa Army.
Samtang, sa pikas nga bahin, nanghinaot na lamang ang kadaghanan nga dili maapektuhan sa maot nga panahon ang nindot nga view sa mahitabo nga global event nga annular solar eclipse karong adlawa, adlaw nga Hwebes, Disyembre 26.
Gikumpirma ni Mr. Binrio Biñan, ang labaw sa PAG-ASA Gensan ug usa sya ka meteorologist, nga sa tibuok Pilipinas, gawas sa Balut Island sa Davao Occidental, makita usab matud pa sa Barangay Batulaki, Glan, Sarangani Province ang maayong view sa pagtabon sa bulan ngadto sa adlaw, ring of fire eclipse. Mahitabo kini unya gikan alas 12pm sa udto paingon na alas 3pm sa hapon.
