Nagmaya na usab karon ang Sarangani Province tungod kay gideklara nga usa sa Top 10 Most Outstanding Provincial Jail sa entiro Pilipinas ang Provincial Jail sa Sarangani. Samtang ang warden nga si Manuel “Busoy” Sales Jr. ang gideklara usab nga usa sa Top 10 Most Outstanding Provincial Jail Employee sa tibuok nasud. Kini nga award ang gihatag mismo gikan sa Provincial Jail Employees Association of the Philippines og sa Bureau of Corrections didto sa Muntinlupa atong Disyembre 3.
Dako ang pagpasalamat ni Warden Sales ngadto sa pamunuan ni Governor Steve Chiongbian Solon tungod kay sa dakong pag-ayuda sa Provincial Government nga gipatuman sulod sa provincial jail, nahimo na karon silang inila nga reformatory facility sa Pilipinas taliwala nga adunay sobra otsyenta (80+) ka provincial jail. Giila matud pa nila nga ang Sarangani Provincial Jail maoy lugar nga kabag-uhan sa kinabuhi sa tao og dili aron silutan na lang sa entiro kinabuhi.
Kagahapon, hilabihan ang kalipay sa mga piniriso sa Sarangani Provincial Jail tungod kay apil sila naduaw sa mga sikat nga billiard player og world champion. Anaa mismo sila Efren “Bata” Reyes, Dennis Orcollo, Django Bustamante, Ronnie Alcano, Johann Chua, og Jeffrey Ignacio. Muapil sila sa padula nga billiard ni Senador Manny Pacquiao alang sa iyang adlaw nga natawhan karong Lunes. Karong Kapaskuhan, may matigayon pud nga Billiard Extravaganza Pamaskong Handog para sa Bilanggo sulod sa Sarangani Provincial Jail.
