Sarangani Province—-Mismong si Assistant Secretary Daniel Angelo Mercado sa Department of Tourism ang nag-deklara nga No. 1 beach event sa entiro Mindanao ang Sarangani Bay Festival.
Segun sa maong opisyal, sya usa ka lumad nga taga-Zamboanga del Sur, daghan na siyang naadtuan nga mga beach party, apan ang SarBay Fest matud pa ang naglakra sa iyang panumduman tungod sa pinakadaghang tao ang personal niyang nakita, sama sa gilauman nisobra og One Hundred Thousand (100k+) kabuok indibidwal. Sa culmination night, halos magbanggaanay na sa abaga ang mga SarBay Citizens nagpunsisok sa kadaghan. Ubay-ubay nga mga foreigner ang nakisadya, sama na lang nila Creik Cooksley, taga-nasud England og Anthony Lousper, taga-Africa.
Gibutyag ni Asec. Mercado nga wala sya nagmahay nga paspas nga nibiya sa Cebu aron adtuan ang SarBay Fest human nga gitawagan sya sa bag-ong Department of Tourism Secretary Bernabe Romulo-Puyat nga i-representa ang Department of Tourism.
Iyang gidayig ang mga organizer sa pagpanguna ni Governor Steve Chiongbian Solon tungod sa nahitabo nga Party for a Cause. Ang Marawi ang nahimo matud pang inspirasyon nganong nahimong magarbuhon ang pagbalik sa SarBay Fest 2018.
Samtang, si Department of Tourism 12 Regional Director Rica Bueno ang namahayag nga dili kini makatuo nga kaya sa mga organizer og mga Sarbay goers nga magbinuntagay sa mga gihan-ay nga aktibidad sulod sa straight tulo (3) ka adlaw, apan kini ang nahitabo. Apan mas labi niyang gidayig nga taliwala sa gidaghanon sa mga tao nagpabilin nga limpyo ang entiro kabaybayunan. Walay duha-duha matud pa niyang gi-rekomenda ang Sarangani Bay Festival sa Gumasa fine white powdery beaches human sa pagsirado sa Boracay.
Sa mga pagpaningkamot nga maampingan ang tibuok Sarangani Bay og kinaiyahan sa probinsya, si Ilocos Norte Governor Imee Marcos na ang nagpasalamat ngadto kang Governor Solon tungod kay nagkatakdo matud pa ang ilang mga tumong sa clean and green program. Human giadtuan ni Governor Imee ang SarBay Fest, iya pang natambungan ang usa ka education activity sa Sulong Karunungan program.
Natapos ang SarBay Fest 2018 nga walay kagubot og pinaagi sa magarbuhon nga fireworks display nilungtad og sobra kinse (15) minutos, og ang Eco-Party clean-up drive kagahapon sa buntag giubanan sa mga Scubasurero masiguro nga walay mga basura ang nagpabilin ilalum sa dagat. Suportado kini nila Senador Manny og Congressman Ruel Pacquiao, Vice Governor Elmer De Peralta, mga board member og Glan municipal og barangay officials.
