Davao City – Miabot og 4th ug General Alarm ang dakong sunog sa tulo ka purok sa Barangay Sasa ning siyudad nga nagsugod og 10:47 sa buntag ug naglungtad og 3:15 sa hapon kagahapon.
Gumikan sa kadako sa kalayo, halos walay nasalba nga mga gamit ang mga biktima gikan sa na-ugdaw nilang mga panimalay sa zone 5, zone 6 ug Purok Muslim Village sa Kilometer 11 Sasa ning siyudad.
Tungod sa kahadlok ni Charmaine Royna sa nagdilaab nga kalayo napugos kini og lukso sa dagat uban sa iyang anak nga si Clyde resulta pareho sila nakaangkon og dakong samad tungod sa sisi sa dagat.
Daw mitulo ang mga luha ni Inday Palle kay bag-o pa gani sila nakarekober sa sunog niadtong 2013 apan karon na-usbanan na pod ug sama kaniadto wala gihapoy silay nasalba sa ilang mga gamit.
Tungod sa kaaranta ni Jenny Glory Salip, wala na kini nakahigayon og hakwat sa ilang mga gamit gawas sa iyang cellphone.
Base sa assessment sa Barangay Sasa Health Center, daghan sa mga biktima nakasinati og trauma ug highblood tungod sa ikaduhang trahediya nga miigo sa ila nga dapit.
Sumala ni midwife Neriza Delos Santos, sagad sa mga na-trauma mao ang mga inahan ug ang mga senior citizens nunot sa pagkahurot sa ilang mga balay ug mga kabtangan.
Gipasabot niini, sa ani nga panghitabo natural lang nga muagi sa trauma ang mga biktima labaw na nga wala sila masayod sa ilang pagahimoon karon nga nawad-an na pod sila og mga pinuy-anan.
Sa karon, ang Red Cross of the Philippines Davao City Chapter nagmuntar na og Welfare Desk sa tulo ka evacuation centers aron mapailawom sa guidance and counseling ang mga biktima sa sunog.
RadyoMaN Joel Viray
