Davao City – Hugot nga bantayan karon sa Sasa PNP ang naarestong suspek sa giingong pagpanglugos sa 16 anyos nga dalaga sa may Zone 4 KM 13, Panacan Davao City alas 9:30 kagabie.
Gimanduan ni Sasa PNP Station Commander PCI Ruben Libera ang iyang mga kapulisan nga i-monitor kanunay ang suspek nga si Mario Barbangsa, 27 anyos ug taga- Sagrada Familia Km 12, Sasa ning dakyaban sa Davao aron dili usab kini makahigayon ug himo pa og dautan sulod sa ilang poder.
Gikonsidera ni Libera nga High Risk Inmate ang suspek human nga gawas sa gitudlo kini karon sa pagpanglugos nahilambigit usab kini sa laing mga krimen sama sa pagpangawat ug pagpanghulga.
Matud ni Libera nga nakaandam usab ang kapulisan kung mamahimo mang bayolente ang suspek ug gipaniguro usab niya nga dili mabutang sa peligro ang iyang mga kapulisan.
Segun ni Libera nga monitoron usab nila ang suspek human nga aduna nay insidente kaniadto diin adunay piniriso nga naghikog sulod sa selda.
RadyoMaN Aimee Guinita
