Sasa PNP: Top 1 city level patay sa buy-bust operation

Davao City – Patay ang usa ka Top 1 City Level sa kampanya kontra ilegal nga droga sa area of responsibility sa Sasa Police Station human giingong misukol sa mga awtoridad sa gilusad nga buy-bust operation sa kilid sa Ramos National High School sa Barangay Aliongto, bandang alas 11:39 sa gabii.

Subay niini nasayran sa kapolisan nga nakigtraksak sa suspek nga si Alyas Nonat, una kining mibunot og pistola ug dayon pamusil sa mga sakop sa Drug Enforcement Unit sa Presinto #4 sa pagpanguna ni Police Captain Ryan Kenneth Ramones ug sa elemento sa Davao City Maritime sa pagpanguna ni Police Major John John Paller hinungdan mibawos og pusil ang mga awtoridad nga miresulta sa kamatayon sa suspek.

Gidala pa sa Southern Philippines Medical Center (SPMC), ang suspek nga naila sa tinuod nga pangalang si Ronald Escarpe, 30 anyos, ulitawo, nagpuyo sa Isla Verde, Barangay 23, ug gikonsiderang Top 1 City Level sa listahan sa mga tigpayuhot og ilegal nga droga apan di malas kay gideklara kining patay na sa doctor nga mihiling kaniya.

Ang Scene of the Crime Operatives (SOCO) gikan sa Regional Forensic Unit 11 sa pagpanguna ni PEMS Sherwin Valmores, nakarekober og tulo ka basyo sa bala sa 9MM, .38 revolver nga dunay mga bala ug duha ka basiyo, color brown nga bag ug dunay sulod nga walo ka pakete sa gitohoang shabu, kapin 200 pesos, ug 500 pesos nga mark money.

Ang patay’ng lawas sa suspek anaa karon sa morgue sa SPMC, samtang gipaabot pang kuhaon kini sa mga kabanay.

RadyoMaN Joel Viray