SAVE PANAY RIVER | Technical Working Group sang Save Panay River Development Council, nagpatigayon sang river tour agud hibaluon ang mga problema sa mga kasubaan sa probinsya

Roxas City, Capiz – Nangin madinalag-on ang duha ka adlaw nga river tour sang Technical Working Group sang Save Panay River Council sang Capiz Provincial Government sa Panay River humalin kahapon Agosto 8 tubtub subong nga adlaw, Agosto 9.
Ini ang ginpahayag ni Capiz Provincial Environment and Natural Resources Office (CaPENRO) – Head, Atty. Emilyn Arboleda-Depon sa interview sang DYVR RMN Roxas.
Suno kay Depon, tuman ka importante ang nasambit river tour bangud pinaagi sini magapatigayon ang mga ini sang assessment kag evaluation agud mahibaluan kun ano ang mga problema sang mga kasubaan sa probinsya nga kinahanglan solusyunan.
Gindugang man sini nga antes magdihon sang strategic planning kag nagakaigo nga programa, dapat hibaluon anay ang mga problema agud mangin mahapos ang pagsulbar sini. Ang ini nga tikang ang kabahin sang 5-year Panay River Management and Rehabilitation Plan nga ginadihon sang administrasyon ni Governor Antonio del Rosario.
Nahibaluan nga apat ka mga lugar ang ginlibot sang Technical Working Group kun sa diin ginsubay sang mga ini ang Lawaan River, Banica, Palina kag Cadimahan River. Nangin kabahin sang river tour ang CaPENRO, OPA, DPWH, BFAR, kag iban pa nga ahensya sang gobyerno.
Samtang ginkakibot sang Technical Working Group sang Panay River Development Council ang pagkitid kag pagnabaw sang suba, madamo nga illegal structures nga yara na sa tunga sang kasubaan, basura kag informal settlers sa kilid sang suba nga nagaresulta sang dako nga halit sa Panay River.

Facebook Comments