Sindangan, ZDN-Wala masayod ang mga estudyanteng sakay sa Jeep sa usa ka konsehal didto sa lungsod sa Sindangan, ZDN, nga mao na diay to ang katapusang adlaw niya diri ibabaw sa kalibutan.
Nagkaguliyang ug naputos sa kahadlok ang mga estudyante niadtong higayona didto sulod mismo sa sakyanan, human gipusil ang numero unong Konsehal sa lungsod sa Sindangan nga si SB Member Cicero Gurrea, 59 anyos kagahapon sa buntag didto sa may Barangay Piao, Sindangan, ZDN mga 5:50AM kapin kun kulang.
Matod pa sa naka saksi, kini si Konsehal Gurrea nga taga Brgy. Lagag, nag maneho kini sa iyang Jeep sakay ang mga estudyante para ihatod sa eskwelahan sa Sindangan National High School.
Samtang naglawig ang gimaneho niini nga Jeep, kalit lang adunay mi overtake nga motor sakay ang duha ka kriminal ug sa walay pag duha-duha, ang mibunot kini ug armas dayong pusil sa makatulo ka higayon, nakaangkon ug duha ka samad pinusilan sa iyang dughan, dali pa kining gitabang para dad-on sa balay tambalanan, apan gikutloan na kini sa iyang hinulamang kinabuhi.
Si SB member Gurrea, kanhi kini Ex Officio Board member ug ABC president sa lungsod sa Sindangan, ug sa miaging eleksyon niadtong bulan sa maayo, nabutang kini siya sa unang pwesto pagka konsehal sa mao nga lungsod human napili pag usab.
Kanhi usab kini Visual Arts Coordinator-ZDN sa National Commission for Culture and Arts, mi graduar kini siya sa UP-Diliman sa kursong Bachelor of Fine Arts, ug nagkuha sab ug kursong bachelor of Laws sa Philippine Advent College- Sindangan, kanhi sab kini instructor sa St. Joseph College.
Matod pa, kini si SB Member Gurrea, naandan na niini nga mag hatod ug mga estudyante sa eskwelahan sakay sa iyang Jeep nga libre, tungod kay kini ang iyang gipasalig atol sa piniliay.
Matod pa sa hepe sa maong lungsod nga si Police Maj. Hartzel Peter Billedo, nga posibleng giatangan kini tungod kay kada buntag man kini mag byahe para mag hatod ug mga estudyante hinungdan nga naka higayon ang mga kreminal.
Sa pagkakaron padayon ang gihimong imbistigasyon sa kapulisan sa Sindangan, kun unsay nagpaluyong motibo sa pagpamusil kun may kalabutan ba kini sa pulitika o sa iyahang personal nga kinabuhi.
