Davao City – Giklaro karon sa Department of Education (DepEd) Davao Region nga lakip sa ilang gitagan-an og pundo ang seguridad sa mga tulonghaan palibot sa Rehiyon Onse.
Matud ni DepEd-XI Spokesperson Jenielito ‘Dodong’ Atillo nga prayoridad nila ang seguridad sa ilang mga magtutudlo ug mga estudyante samtang anaa sila sulod sa mga tulonghaan.
Ang DepEd mibutang og pundo diha sa Maintenance and Other Operating Expenses (MOOE) sarang magamit sa mga tulonghaan sa pagsweldo sa janitor, kuryente, lakip na sekyu ug uban pang galastuhanan.
Apan segun ni Atillo, ang paggahin og pundo sa MOOE magdepende usab kini sa gidak-on sa eskwelahan ug gidaghanon sa mga magtutudlo ug mga estudyante.
Dugang pa ni Atillo, adunay kagawasan ang tulonghaan sa pagduol ngadto sa lokal nga kagamhanan ug sa PTA aron pangayoon ang ayuda alang sa seguridad aron adunay security guards ang ilang eskwelahan.
Ugaling magdumili ang LGU ug ang PTA sa pagtabang, ang laing opsiyon mao ang pagduol ngadto sa kumunidad nga anaa sa palibot sa eskwelahan aron hangyoon sa pag-abag diha sa pagbantay sa tulonghaan.
RadyoMaN Joel Viray
