Scout Ranger nga namatay sa Marawi City, miabot na sa Gensan

General Santos City—miabot na sa Gensan ang patayng lawas sa Scout Ranger nga si PFC Felmark Dalogdog, miyembro sa Scout Ranger 2nd Battalion nga taga Maasim, Sarangani Province nga una nang namatay sa engkwentro sa Marawi City.
Alas 11:00 pasado ang takna kaganinang buntag dihang miabot sa Gensan City International Airport ang nomad plane nga iyaha sa Philippine Airforce nga gisakyan sa patayng lawas sa maong sundalo.
Gihatagan kini ug Military Honor ang nahisgutan sa pagpanguna ni Col. Tyne BaƱas, Commanding officer sa 1002nd Bridage Philippine Army.
Apil misugat sa patayng lawas sa nahisgutan ang asawa niini ingon man mga kabanay. Anaa usab ang igsuon niini nga si PFC Ken Carlo Dalogdog, miyembro sa Special Forces Philippine Army.
Nakatulo ang luha ni PFC Ken human sa kamatayon sa iyang magulang. Wala kini magtuo nga mamatay kini sa gyera didto sa Marawi City. Sama niya usa ka maayong tawo ug dedikado sa trabaho ang iyang magulang.
Nasayran nga anaa palang sa lima ka tuig sa serbisyo si PFC Felmark Dalogdog. Samtang gideretso usab sa ilang panimalay sa Maasim, Sarangani Province ang patayng lawas sa maong sundalo.

Facebook Comments