(photo credits: Gov.Philip Tan)
Nag-positibo sa confirmatory RT-PCR test ang seafarer o marino nga taga-Misamis Occidental, kinsa nag-positibo sa gihimong rapid antibody test dihang midunggo kini sa pantalan sa Ozamiz City niadtong Abril 28 sa gabii.
Kini ang gikumpima kagahapon ni Misamis Occidental Governor Philip Tan.
Matud pa ni Tan nga ipailawom sa laing repeat confirmatory RT-PACR test ang maong marino human ang 16 ka adlaw aron pagsuta kung mag-negative na o mag-positive pa kini sa COVID-19.
Anaa na kini karon sa MHARSG Medical Center sa Ozamiz City samtang ang iyang mga kauban anaa sa quarantine facility sa ilang matag lungsod.
Naka-uli ang maong marino kauban ang laing upat pa ka mga taga-Ozamiz City ug ubang lungsod sa Misamis Occidental sakay sa barkong St. Michael The Archangel sa 2GO Shipping.
Kabahin sila sa kapin 300 ka mga overseas workers nga na-repatriate tungod sa coronavirus pandemic.
Kauban sa maong biyahe ang upat ka mga taga-Lanao del Norte kinsa ang usa nag-positibo usab sa rapid antibody test ug duha ka mga taga-Lanao del Sur, diin ang usa nag-positibo usab.
Wala pay gipagawas ang Inter-Agency task Force on COVID sa duha ka mga probinsiya.
Kauban usab sa maong biyahe ang duha ka mga taga-Iligan City apan wala na kini gipailawom sa rapid antibody test. (Divina M. Suson, Misamis Occidental, May 6)
