Un seaman y un pulis mojer amo el maga mas reciente victima de tiro na Tetuan y San Roque enantes aga. Todo sila muerto.
Serca man alas 7 del aga si Almondo Monterola, 48, casao, de Waray, Tetuan y un Chief Engineer na un shipping lines muntao consu motorsiclo encamino para bolbe pasando na Don Alfaro Street, Tetuan y llegar enfrentero del City Mall, tiene ya lang dos persona muntao na otro motorsiclo ya hace apas conele y el ancas ya rega de bala conele.
Ta resulya pa si Monterola cuando ya tumba le na calsada y despues del cuantos minute ya rebenta ya su resuelyo.
Maga pulis ya recobri cuantos capsula de calibre 45 pistola na lugar del incidente.
Ya pasa mas de dos hora, si PO2 Lydia Halip, assigned na Sinunuc Police Station manejando le consu scooter motorsiclo y ancas conele su hermana y subrina pasando con el calsada del San Roque na direccion para na pueblo estab na diila apartment cuando ya man lampas sila na cementerio de Chino tiene tambien dos otro persona muntao ancas na otro motorsiclo ya hace apas canila y el ancas ya tira con Halip mientras egual sila na corre na camino.
Ya tumba el motorsiclo di Halip porcausa con el tupada de bala na su cabesa mientras su hermana y subrina ya sostene gas-gas na pies por el tumbada.
Ta resulya pa tamen si Halip cuando ya tumba le pero despues lang del cuantos minuto ya rebenta ya su resuelyo.
Todol maga criminal na dos incidente ya escapa antede llega el maga otoridad.
