General Santos City—Posibling makasuhan ug kasong kalapasan sa Comprehensive Law on firearms and Ammunition ang usa ka Imam human nga nakuhaan ug mga bala sa pusil ang panimalay niini nga nahimutang sa Purok Islam, Barangay South, Gensan atol sa gihimong Search Operation alas 4:00 ang takna kaganinang kabuntagon.
Una nang gironda ang panimalay ni Ustadz Saipodin Manapaap, legal age, Imam ug Mosgue administrator, residenti sa nasampit nga lugar human nga nakadawat ug report ang kapulisan nga naghupot ug armas ang nasangpit.
Wala ang target nga si Manapaap sa iyang balay dihang gihimo ang ronda apan nakuhaan kini ug (4) ka bala sa Cal. 45 pistol; (4) ka bala sa 9mm; ug (1) ka magazine sa cal. 45 pistol.
Sumala sa asawa ni Manapaap nga si Racima Adol nga dili iyaha sa iyang bana ang maong mga bala sanglit posibling gipanag-iyahan kini sa ilang boarder nga nag renta sa lawak hain nakaplagan ang mga bala.
Gipaklaro usab niini nga walay gihuptang armas ang iyang bana sukwahi sa nakalatid sa search warrant nga bitbit sa kapulisan nga matud pa dunay gihuptang pusil ang Imam.
Sa karon ang mga balang narekober giturn-over na ngadto sa Crime Laboratory.
(Photo From Web)
