Davao City – Gikumpirma sa Securities and Exchange Commission (SEC)-Davao nga dili rehistrado ang REPA o REPA PALUWAGAN nga mibiktima og dili moubos sa 30 ka mga investor dinhi sa syudad sa Davao.
Sa gipagawas nga advisory sa SEC, gipasabot niini nga tungod kay dili rehistrado ang maong kumpanya, wala kini katungod nga mag-solicit og investment o placement gikan sa publiko, o bisan mag-issue og investment contracts ug ubang klase sa securities tungod kay wala kini lisensya sa SEC nga gikinahanglan ilawom sa Sections 8 ug 12 sa Securities Regulation Code.
“For the information and guidance of the public, REPA/REPA PALUWAGAN DOES NOT APPEAR AS A REGISTERED CORPORATION OR PARTNERSHIP,” abiso sa SEC.
Nasayran nga naga-operate ang REPA/REPA PALUWAGAN sa Bohol, Bukidnon, Cebu ug dinhi sa Davao diin kini makonsiderang ‘Ponzi Scheme’ tungod sa pagbayad sa mga investors og kwarta gikan ra usab sa bag-ong nag-invest.
Una nang gibutyag sa DXDC RMN Davao sa usa sa mga investors sa syudad nga mi-invest og P400,000 nga mas aduna pa kini kaubanan nga muabot sa P2.6 million hangtud na sa P7.7 million ang ilang kwartang gisugal.
RadyoMaN Kirby Manzon
