Patay ang isa ka security matapos luthangon sang wala nakilal-an nga suspek alas 11:30 sang nagligad nga aga sa Purok Paghidait, Barangay San Vicente, Banga, South Cotabato.
Ginkilala ang biktima kay Carlito Biñas Corpuz Jr, may legal nga edad, may asawa security guard sang Phela Eagle security agency nga nakabasi sa syudad sang Heneral Santos kag nadestino sa DOST-12, residente sang New Pangasinan, (Bo.4) syudad sang Koronadal.
Sa imbestigasyon sang Banga MPS sa testigo, ginabaybay suno pa sang biktima ang dalan padulong sa Barangay Malaya sa nasambit nga Banwa sakay sa iya skygo nga motorsiklo, apang pag-abot suno pa sa lugar nga gintabuan, nakaaway sini ang suspek sa diin nagtapungolay sila sa dalan tubtub nga ginluthan sang suspek ang biktima gamit ang kalibre 45 nga armas luthang.
Bangud sa insidente, nakaangkon sang pilas ang biktima sa iban nga parte sang iya lawas nga nangin tunaan sang iya hinali nga kamatayon.
Samtang madasig naman nagpalagyo ang suspek sakay sa Kawasaki rouser nga single motor, nagaduag sang itom kag wala sang plaka.
Narekober naman sa gintabuan sang krimen ang tatlo ka basiyo kag sa isa ka bala sang kalibre 45.
Sa subong padayon pa ang ginahimo nga imbestigasyon sang Banga MPS bahin sa motibo kag identity sang suspek samtang ang bangkay sang biktima nagapabilin pa sa punerarya sa nasambit nga banwa para sa post mortem examination.
