CALBAYOG CITY, Samar – Ginpamumusil an usa nga Security Guard ha Gomez St. Brgy. Central Calbayog City, Samar kakulop han alas 4:34 han aga.
Basi ha report han PNP Regional Office, ginkilala an biktima nga hi Miguel Diaz, aada na ha sakto nga pangidaron, may asawa; ginkilala naman liwat an suspek nga hi Marlon Mas alyas “bebot”, 60 anyos may asawa, waray trabaho ngan pareho nga residente ha Brgy. Dagum ha nasabi nga syudad.
Ha nagawas nga inisyal nga imbistigasyon han mga otoridad, nagbabaktas an biktima tipakadto ha iya gintatrabahuan ngan tigda la nga nagpakita an suspek ha iya ngan bumunot hin .45 caliber nga pusil ngan ginpabuto ha iya.
Naangkon han biktima an igo han bala han pusil ha iya liog nga parte han iya lawas.
Gindara naman dayon an biktima ha Calbayog District Hospital para mabulong.
Samtang, diretso naman nga naaresto an suspek han mga kapulisan.
Paslak na an suspek ha Calbayog City Police Station ngan maatubang hin kaangayan nga kaso.
