Nisuyod sa top10 nan Principal’s Examination 2018 an byuda ug inahan na Surigaonon na si Maria Ruth Edradan. Si Edradan nakapwesto sa top7, ug sa 47 na mikuha nan exam sa tibuok CARAGA region 20 ra an nakapasar. An 47-anyos na topnotcher nagtapos nan BS in Zoology sa Mindanao State University, apil sab an M.A in Science Teaching sa St.Paul University Surigao (SPUS) ug Doctorate degree in Education Management sa SPUS gihapon. Sa exclusibo na pakighinabi nan RMN Sutigao kan Edradan, gisulti nija na waya unta sa ija plano mutake nan exam tungod kay adiser an ija exam nibija sa kalibutan an ija anak na babaje tungod sa sakit na brain aneurysm, apil isab an pagkamatay sa ija bana ug amahan an miagi na tuig. Pero waya mahutdi sa paglaom si Edradan ug ija nuon ini taghimo na inspirasyon para maabot an karajawan sanan an paglig-on pa sa pagtoo ug pagsalig sa Ginoo. Si Edradan isab an miyembro sa Dragonboat team na ‘Bugsay Marajaw’ kun diin sila bag-ohay pa na nahimong kampeon sa 1st International Dragonboat Summer Festival dire mismo sa syudad, na amoy isab ija gihimo na kalingawan. Nagmalaumon si Edradan na unta an ija mga kaagi sa kinabuhi mahimo na inspirasyon sa tanan ug mapasalamaton sija sa tanan na nitabang sa ija ug naghatag nan motivation para mupadajon sa ija mga damgo ug sa ija kinabuhi.( RadyoMaN Winston Ensomo)
