General Santos City–Gikabutyag ni Brigader General Adonis Bajao ang Commanding Officer sa 1002nd Brigade Philippine Army nga sa pagkakaron mas gipahugtan pa nila ang ginapatuman nga pagbantay sa seguridad sa ilahang area of responsibility.
Gani sumala pa niini nga sa matag checkpoint pasulod ug paggawas sa ilahang AOR hugot usab ang ilang ginapatuman nga pagbantay sa seguridad human sa nahitabong pagbusikad sa gituohang IED sa may Isulan, Sultan Kudarat niadtong adlaw’ng Sabado kung asa pipila ka mga tawo ang nasamdan.
Pagpaklaro usab sa opisyal nga iyaha nang naestorya ang labaw sa Joint Task Force Gensan nga si Col.Gubat nga mas hugtan pa nila ang pagbantay sa mga checkpoint sa Gensan aron masiguro nga dili makalusot ang mga dautang elemento nga buot lang nga mohimo ug kasamok sa lugar.
Samtang gipangayo usab ni Brigader General Adonis Bajao sa mga motorista nga patas-an ang ilahang pasensiya gumikan kay lauman gayud ang taas nga traffic sa matag checkpoint tungod sa estriktong ipatuman sa pag check sa mga pampubliko ug pribadong mga sakyanan.
saysay usab ni General Bajao nga sa susama niining sitwasyon nga nahitabo sa Isulan gilayon man usab nga mopataas ug alerto ang kapulisan ug kasundaluhan aron lamang masiguro gayud ang seguridad sa katawhan.
Giawhag sa opisyal ang katawhan nga makigtambayayong ngadto kanila nga kung duna silay nakit-an nga kaduda-duhang mga tawo ingon man mga butang nga gibutang lang bisan asa nga lugar gilayon kining ireport sa otoridad aron gilayon nga mahatagan ug aksyon . (Reynald Timario)
