General Santos City–Mas gipahugtan karon sa Polomolok PNP ang ilang siguridad human nga sa ilang silda nadetina ang suspek sa pagpamomba gawas nga bahin sa Bonita Lying Inn Center sa may Barangay Apopong Gensan naidtong Setyembre 2, 2018.
Nasayran nga si Alonzo unang nadakpan sa gihimong buybust operation sa kapulisan sa lungsod sa Polomolok niadtong nakalabayng simana ug positibo kining gitudlo sa testigo nga maoy suspek sa pagpamomba.
Sumala ni Police Chief Inspector Alex Joe Orcajada, hepe sa Polomolok PNP nga ila nalang karon gihuwat nag commitment order batok sa suspek aron nga mabalhin na kini sa South Cotabato Provincial Jail.
Dugang pagbutyag ni PCI Orcajada nga dependi na usab ngadto sa korte kung asang detention facility prisohon ang nasangpit human nga gipasakaan usab kini ug kaso sa Gensan City Police Office human sa pagpamomba sa Gensan.
Ang ilaha lang nga hangtud anaa pa sa ilang kustudiya ang suspek, ilang gipahugtan ang ilang seguridad gumikan aduna pa kini mga kaubanan sa lungsod sa Polomolok nga pabiling gawasnon ug nagtago-tago.
Nasayran nga si Alonzo ang gikaingong miyembro sa breakaway sa Ansar Al Khilafa Philippines (AKP) kansa iladong supporter sa Mauti ISIS Group nga naglihukan sa pipila ka lugar sa Rehiyon 12.
