General Santos C ity–Human nahitabo ang pagbusikad sa Van didto sa Basilan, mas gipakusgan pa sa Sarangani Police Office ang ilang gipatumang seguridad sa tanang lungsod sa probinsya.
Sumala ni Police Supt. Jeody Condesa, tigpamaba sa Sarangani Police Office nga gimando na ni Police Sr. Supt. Abul Kier Macalancom, ang PNP Provincial Director sa Sarangani Police Office ngadto sa tanang Chief Of Police sa tanang kwerpo sa kapulisan sa probinsya nga pahugtan pa ang ilang gipatumang seguridad.
Tumong aron nga dili malutsan sa mga dautang elemento nga buot maghatag ug kasamok sa probinsya sa Sarangani.
Nakig-alayon na usab ang Sarangani Police Office ngadto sa Philippine Maritime ug Philippine Coastguard alayon sa gipatumang siguridad.
Dili ikalilong nga dunay posibilidad nga sa dagat muagi ang mga dautang elemento nga buot musulod sa Sarangani ug uban pang lugar sa rehiyon.
Samtang nanawagan usab si Condeza ngadto sa katawhan sa probinsya nga mag igmat ug isumbong ngadto sa kapulisan ug militar kung duna silay mga kadudahang tawo o butang nga makit-an sa palibot.
