Sekyu, mibutyag nga wala sa iyang plano ang pagpanulis sa gasoline station; misis, miangkong dunay problema sa kwarta ang bana

135
PC: RadyoMaN Nitz Arancon

Wala sa plano sa suspek nga si Reymark Pamatong, 27 anyos, sekyu sa planta sa mantika sa Villanueva, Misamis Oriental ang pagpanulis sa Phoenix gasoline station kagahapon sa kadlawon.

 

Matud ni Pamatong, nga igo lang sila nag-inum sa iyang kauban kaniadto nga gwardiya nga si Bernie Belen tungod kay iya kining giadtoan mismo sa ilang balay.


 

Dugang pa ni Pamatong nga daghang ilimnon ang ilang nahurot, hinungdan sa iyang pagkahubog ug pagkawala sa iyang saktong panghunahuna.

 

Matud ni Pamatong nga wala na siya nasayud sa mga panghitabo ilabi na ang iyang paghapit sa planta aron paghuwam sa issue nila nga 9mm nga armas.

 

Samtang gibutyag sa asawa ni Pamatong nga dili ga-sige og inum ang iyang bana.

 

Matud sa asawa nga wala siya kahibalo nga nag-inum ang iyang bana niadtong Sabado sa gabei, tungod kay ang pananghid niini kaniya, igo lang moadto sa iyang ginikanan aron mang- hearing og sud-an.

 

Dugang pa sa asawa nga adunay panahon nga matag abot sa iyang bana sa balay sa iyang ginikanan, manghulam kini og cellphone sa iyang igsoon aron magpahibalo kaniya, apan niadtong Sabado wala kini makatawag.

 

Hinoon giangkon sa iyang bana kaniya nga nahimo niini ang pagpanulis ug pagpatay ug nangayo og pasaylo.

 

Gibutyag sa asawa nga sa karon naglisod pa siya sa pagdawat sa nahimo sa iyang bana, tungod kay dili kini parason nga klase sa pagkatawo.

 

Hinoon, giangkon sa asawa sa suspek nga si Reymark Pamatong nga gaproblema sila og kwarta, ilabi na nga permi short sa sweldo ang iyang bana.

 

Matud sa asawa nga ang iyang bana lang ang gatrabaho tungod kay siya ang gabantay sa ilang mga anak.

 

Dako ang pagtuo sa asawa nga na-depress ang iyang bana tungod sa loan niini sa Social Security System kon SSS hinungdan nga nahimo niini ang krimen.

 

Mahinumduman nga nag-loan ang suspek sa SSS niadtong bulan sa Marso aron unta gamiton sa pagpanganak sa iyang asawa apan wala kini naaprobahan tungod kay tulo ka bulan lamang kini nga nakahulog sa contribution, sulod sa walo ka tuig nga pagpanarbaho.

Facebook Comments

From Advertisers