Davao City- Balhog sa selda sa Buhangin PNP ang usa ka sekyu human nanion og pusil sa upat ka trabahante nga wala nakigpustahanay kaniya sa away ni Manny Pacquiao ug Jeff Horn sa Brisbane, Australia niadtong Domingo.
Nagtingkagol si Teofanes Nogadas, 56 anyos, minyo, sekyu sa Metro Stone Rich Corporation nga taga Barangay Communal distrito sa Buhangin, 1:30 sa hapon niadtong adlawng Martes.
Base sa reklamo sa upat nga sila Jade Dejos, Nelson Flores, Roniel Baclay, ug Alexis Sembrano, hubog ang suspek dihang gipangtionan sila og .38 revolver sa sekyu sa walay igong hinungdan.
Suma sa upat, nag-aso-aso sa kasuko si Nogadas dihang gibalibaran ang suspek sa pustahanay sa away nila Pacquiao ug Horn butang nga dili madawat sa sekyu.
Dali nakapangayo og panabang ang upat ngadto kang purok leader Dennis Pedroso busa gi-endosar na sa Buhangin PNP ang sekyu diin gihikay na ang kaso nga grave threat ngadto sa suspek.
Kasamang Joel Viray
