South Cotabato–Selos ug Depresyon ang gitudlong hinungdan sa pagpatay sa amahan sa iyang 6 anyos ug 4-anyos nga anak ayha naghikog sulod sa ilang panimalay sa may barangay Dumadalig, Tantangan, South Cotabato niadtong Lunes sa gabie.
Sumala ni Police Sr. Inspector Redeen Crisologo, Hepe sa Tantangan PNP nga gidunggab patay sa suspek nga si Willy Enables Jr. , 30 anyos , ang iyang mga anak nga silang Rassel 6 anyos ug Angelo, 4 anyos, ayha kini naghikog pinaagi sa pagbitay sa iyang kaugalingon.
Alas 7:00 sa buntag kagahapong adlawa dihang nakaplagan nalang sa inahan sa suspek ang patayng lawas sa iyang anak ug duha ka mga apo sulod sa ilang panimalay.
Gibutyag pa ni PSI Crisologo nga basi sa ilang imbistigasyon sa lugar, nagselos ug nadepress ang suspek human nga milakaw ang iyang asawa sa kauluhang manila aron magpailawom sa training alang sa abroad.
Nasayran nga milakaw matud pa ang misis sa suspek niadtong Hunyo 20. Adunay higayon nga dili dayon niini makontak ang iyang asawa kansa maoy hinungdan sa mga pagduda niini nga aduna kini gikabuangan.
Samtang basi usab sa mga txt message sa suspek sa iyang asawa, iya kining gibaharan nga patyon higayon nga dili kini muuli sa ilang panimalay.
