SEMDDOC: Fuel subsidy sa LTFRB wala napatuman og tarong

Davao City – Wala gikalipay sa Southeastern Mindanao Diversified Drivers and Operators Cooperative (SEMDDOC) ang pamaagi sa paghatag og fuel subsidy sa Land Transportation Franchising and Regulatory Board (LTFRB), tubag sa padayong pagtaas sa presyo sa gasolina.

Sa interbyu sa DXDC RMN Davao kang Maning Duran, SEMDDOC President, gibutyag niini nga adunay ayuda apan adunay mga driver nga nakadawat bisa’g sila wala nagabiyahe, o kaha kini mahatag sa operator, inay sa driver.

“Kani man gong Pantawid Pasada (Program) karon, wala ‘ta kasabot kung para asa gyud ang tag-iya ana. Muingon ang LTFRB nga para sa driver pero gihatag man sa operator. So, dili mao ang pag-implement. Lain ang ilang ginasulti, lain ang ilang ginabuhat,” sulti ni Duran.

Tambag ni Duran nga mas maayo kung ang ayuda idiretso sa mga driver sama sa paghatag og discount gikan sa gasolinahan aron kini diretsong mabati sa mga driver.

Ugmang adlawa (Abril 26, 2022), laing big-time oil price hike ang ipatuman sa mga oil companies, diin anaa sa P3.10 – P3.30 ang itaas sa matag litro sa gasolina samtang, anaa sa P4.20 – P4.40 ang itaas sa mata litro sa diesel.

RadyoMaN Kirby Manzon