*DIPOLOG CITY -*Tungod sa giatubang karon nga kalibutanong krisis sa makalilisang nga sakit nga mao ang Covid-19 wala gikalimtan ni Senate Majority Leader Juan Miguel F. Zubiri ang Zamboanga peninsula pinaagi sa pag donar ug rapid test kits.
May kalabutan kini sa padayong pagpaningkamot sa senador aron masuportahan ang massive testing ilabi na dinhi sa pulo sa Mindanao. Ang pag pang apod-apod sa mga test kits dinhi sa rehiyon 9 nagsugod karong adlawa Mayo 5 hangtod ugmang adlawa.
Moabot sa 800 ka rapid test kits ang ihatag sa rehiyon 9 ug bahinon kini nila ni Zamboanga City mayor Maria Isabelle Climaco; Zamboanga Del sur Gov. Victor Yu; ug Zamboanga Del norte Gov. Roberto Uy.
Kahinumduman una nang nanghatag ug test kits si Sen. Zubiri sa mga ospital dinhi sa Mindnao didto sa Agusan del Norte, Agusan del Sur, Surigao del norte, Surigao del sur, Dinagat Islands, Negros Oriental, Bukidnon, Misamis Oriental, ug Bangsamoro Auronomous Region in Muslim Mindanao.
Butyag pa ni Sen. Zubiri, mihatag siya ug PCR test kits sa Philippine General Hospital (PGH) sa miaging bulan, plano sa senador nga dad-on diri sa Mindano apan limitado lang ang accredited laboratories sama sa Davao City.
Ang gihatag nga rapid test kits dinhi sa rehiyon 9 dako na kining tabang kay bisan walay accredited laboratories, mamahimo kining magamit sumala pa ni Sen. Zubiri.
Sa kasamtangan dili mo ubos sa 240 ang kaso sa Covid-19 dinhi pulo sa Mindanao, ang Zamboanga City nakatala sa ug 60 ka kaso sa makamatay nga covid-19, 5 sa Zamboanga del sur, ug 1 sa Zamboanga del norte.|* MARK BACROYA*
