Davao City – Hugot nga ipatuman sugod karong adlawa, February 11 sa Civil Aviation Authority of the Philippines (CAAP) Davao ang permanenteng pagdili sa paghatod ug pagsundo sa mga grupo o usa ka pamilyahan sa mga pasahero sa airport.
Subay sa istriktong implementasyon niini, bugtong ang driver,pasahero, empleyado, trabahante sa airport,taxi o grab drivers ug mga indibidwal nga adunay transaksyon lamang ang tugtang makasulod sa drop-off ug pick-up zone sa airport.
Sumala ni Engr. Leandro Varquez, OIC Davao Airport Manager, suportado nila kining maong lakang aron malikayan ang pagkaylap dinhi sa peligrosong 2019 Novel Coronavirus Acute Respiratory Disease lakip usab ang pagpalig-on sa security sa lungsod batok sa mga lawless elements.
Kagahapong adlawa human sa gipagulang pamahayag sa alkalde, gipaspasan sa CAAP ang pag-montar sa mga paraphernalia diin naaimprenta ang mga guidelines nga mabasa sa publiko pasulod pa lamang sa airport.
Giawhag karon ang publiko nga motamod sa gipatumang orden sa lokal nga panggamhanan sa Davao.
Mamahimong makasulod ang mga assistants sa mga pasaherong senior citizens, buntis, kadtong adunay dala nga mga babies ug mga gagmayng bata ug mga Persons with Disabilities (PWDs).
Mga high-ranking national government officials, guests of government ug members sa Diplomatic and Consular groups matugutan gihapon uban ang ilang mga security personnel.
RadyoMaN Aimee Guinita
