Alabel, Sarangani Province–Patay ng nakit-an ang usa ka senior citizen sa creek nga bahin sa usa ka farm sa Upper Alabel, Sarangani Province kansa gituohang naanod sa baha tungod sa kusog nga ulan nga gikan sa bukid.
Naila ang biktima nga si Juanito Gemena, 74 anyos, ug residente sa Purok 2, Upper Alabel, Barangay Poblacion.. Pagbutyag ni Police Staff Sargeant Nelson Lalisan, Imbestigador sa Alabel PNP, nga pasado ala 1:00 sa kadlawon mireport ngadto kanila ang Kapitan sa Barangay Poblacion kalabutan sa nakit-ang patayāng lawas sa biktima.
Sumala pa ni Lalisan nga basi sa resulta sa ilang imbestigasyon pauli na ang biktima sa iyang uma gikan sa iyang mga kabanay sa Purok 2 kung asa motabok pa kini ug creek ug niadtong panahona kusog ang ulan sa bukid. Gumikan hinay na molakaw ang nasangpit tungod sa katigulangon naabatan kini sa dakong baha ug naanod nga miresulta sa iyang kamatayon.
Sa pagsuta sa mga otoridad, nakaangkon intawon ug samad sa kalawasan ang biktima nga natabunan ug mga gapnod nga nakit-an sa mga tawo sa lugar. Sa karun ang patayāng lawas sa biktima ang anaa na sa lokal nga punerarya sa maong munisipyo . (RV)
