Nag-atubang karon sa kasong paglapas sa Republic Act 9165 o Comprehensive Dangerous Drugs Act ang usa ka senior citizen ug usa ka magtutudlo human sila masikop sa gihimong buy-bust operation niadtong Martes sa hapon, Abril 9, sa Barangay Muslim, lungsod sa Wao, Lanao del Sur.
Giila sa kapulisan ang mga dinakpan nga sila si Abunsalam Cato, 60 anyos, negosyante, nanag-iya og sari-sari store sa dapit, samtang ang kauban niini nailang usa ka Jabar Arbol Saripada, usa ka non-professional teacher.
Pareho silang mga residente sa dapit.
Matud pa ni Police Captain Jemar Delos Santos, information officer sa Police Regional Office Bangsamoro Autonomous Region in Muslim Mindanao (PRO BARMM), si Saripada ang target sa maong operasyon, apan ang senior citizen maoy mitunol sa gipalit nga shabu sa poseur-buyer.
Wala sa drug watchlist sa kapulisan ang duha ka mga suspek apan giila kining mga ‘newly-identified drug personalities’ pinaagi sa mga una nang nadakpan sa anti-drug operation.
Wala na giklaro sa PNP kung unsa nga tunghaan ug kung unsay gitudlo ni Saripada sa iyang mga tinun-an isip magtutudlo.
Nakuha sa maong operasyon ang usa ka sachet sa gituohang ‘shabu’ ug ang 500 pesos nga marked money nga maoy gigamit sa maong trasaksiyon.
