Davao city- Patay sulod sa Southern Philippines Medical Center kun SPMC ang usa ka senior citizen human naligsan sa motor alas 5:50 kagahapon sa hapon.
Igo na lang nagpahibalo ang mga kabanay sa Sasa PNP nga gideklara sa miatiman nga doktor sa SPMC nga patay na si Florencio Noro, 65 anyos, minyo, ug nagpuyo sa Cabayugan Uno, kilometer 11 Sasa ning dakbayan.
Migula sa imbestigasyon sa traffic section sa Sasa PNP nga patabok na unta ang biktima dihang kalit kini gidasmagan sa naghaguros nga suzuki motorcycle nga mupaingon sa south bound area.
Tungod sa kakusog sa pagkabangga nalagpot og pila ka metros si Noro ug imbes tabangan ang biktima nagpaturatoy og padagan ang driver sa motor.
Daling miresponde ang medic team sa central 911 ug gihatud ang biktima sa SPMC apan pasado alas 10 kagabii gideklara nga patay ang biktima.
RadyoMaN Joel Viray
