Sa interview sa DXDC RMN Davao kang Carmelita Quimat, usa sa anak sa gikulata nga si Asuncion Hiagonia, 79 anyos, iyahang gisaysay nga nasuko ang iyahang igsoon nga si Lito, 56 anyos tungod kay aksidenteng nalapas ug naputol sa iyahang inahan ang tinanom nga goma sa area niini.
Tungod sa kalagot, mikuha og sanga sa goma si Lito ug didto na gibunal-bunalan ang iyahang inahan nga nagkadugo ug nagkadusmo-dusmo sa pagdagan.
“Naglimpyo-limyo na si mama. Naa poy iyahang mga tanom anang uma nga naapil diri sa kang mama nga bahin kay iyaha mang ginatuman tanan og goma, kanang rubber. Karon kay si mama nakalapas man siya og putol sa goma dapit sa iyahang lugar, mao ‘to iyang gikasuko,” saysay ni Quimat.
Dugang niya nga daw adik ang iyahang igsoon tungod kay mikatawa ra kini human nakit-an nga nagkadugo ang iyhang inahan.
Nasayrang pinangga kaayo sa ilang inahan si Lito. Gani, human niya gibaligya ang iyahang yuta sa Bukidnon, gipalitan kini og yuta sa Butuan, apan gibaligya gihapon.
RadyoMaN Kirby Manzon
