Senior’s social pension gikabalak-an

Davao City – Nabalaka karon ang Senior Citizen Tibungco Chapter sa posibleng pagwagtang sa 91,000 ka tigulang isip benepisaryo sa social pension program sa Department of Social Welfare and Development (DSWD) sunod tuig.

Sumala ni Senior Citizen Tibungco Chapter President Josie Puntilar, gisulti niini nga mag-unsa na lang ang mga tigulang nga dili na makadawat og 500 pesos pinaagi sa social pension sa sunod tuig.

Segun ni Puntilar, daghan sa mga katigulangan nga wala na’y laing gisaligan ang naglaum sa 500 pesos nga subsidy matag bulan kon dili na kaya sa gobyerno maghatag og pondo alang sa social pension.


Matud ni Puntilar, gamay lang tuod ang 500 pesos apan dako na kining tabang aron makapalit og tambal ug uban pang panginahanglanon sa mga senior citizen nga walay SSS ug GSIS pension matag bulan.

“Kung murag naglisod gyod ang gobyerno wala man ta’y mahimo ana pero luoy lang tong mga senior ba nga walang-walang nga nagkinahanglan pod unta to sila og igong pagtagad nga tabangan sila sa gobyerno,” segun ni Puntilar.

Nasayran nga sa 2019, ang Department of Budget and Management naghatag og 23 billion pesos nga pondo sa social pension sa DSWD nga gitagana alang sa kapin 3 million nga mga benepisaryo sa kina-tibuk-ang nasud.

Dili motoo si Puntilar sa rason sa nasudnong ahensiya nga unlod na ang pondo sa nasudnong gobyerno aron kibhangan ang gidaghanon sa mga tigulang nga dili na maayodahan sa social pension sa sunod tuig.

Hinoon andam musabot Puntilar sa sitwasyon karon sa nasudnong gobyerno nga naglisod gayod sa hisgutanang panalapi dala sa grabe nga nang epekto sa pandemya.

Apan nanawagan gihapon ang Pangulo sa mga tigulang sa Tibungco sa gobyerno nga gahinan og igong pondo ang social pension sa DSWD aron dili maputol ug padayon gihapon maayudahan sa pinansiyal ang libuan ka mga tigulang sa Pilipinas sa 2021.

RadyoMaN Joel Viray

Facebook Comments