Davao City – Giklaro karon sa Davao City Police Office (DCPO) nga wala mahunong ang serbisyo sa Toril Police Station sa publiko bisan og naka-lockdown kini human dunay nagpositibo sa COVID-19 nga mga piniriso ug mga pulis.
Gitin-aw ni DCPO Spokesperson Police Captain Rose Aguilar nga 85% sa espasyo sa Toril Police Station ang wala gi-lockdown maong nagpadayon sa pagpangalagad ang mga pulis sa katawhan sa Toril karon.
Gani, suma ni Aguilar nga wala maapektuhi ang blotter section, WCPD, ug uban pang section samtang ang ubang pulis makita sa kadalanan padayon nga nagpatrolya alang sa seguridad sa mga nag-unang lugar sa Toril.
Segun ni Aguilar nga mag-agad ang DCPO sa resulta sa swab test nga gihimo sa mga na-expose nga mga personahe ug piniriso sa mga nagpositibo sa COVID-19.
Nasayran nga 30 ka piniriso ug 14 ka pulis ang gipailawom sa swab test human sila natakdan sa usa ka dinakpan.
Gimandoan na karon ni DCPO City Director Col. John Kirby Kraft ang tanang Police Stations sa dakbayan nga hugot gayod ipatuman ang protocol aron dili na masubli ang nahitabo sa Toril Police Station.
“Ang mando sa atong City Director, mas pahugtan pa gayod ang kadtong gina-pahigayon nga protocol so ang Police Service didto (Toril PNP) wala maapektohan kay gamay ramang porsyento ang na-lockdown ug ang 85% niana functional man,” segun ni Aguilar.
Matud ni Aguilar, ang DCPO nag-deploy na og kaugalingong mga nurse sa mga istasyon sa kapulisan sa siyudad aron maoy manguna sa paglusad og rapid test ug swab test sa tanang madakpan ug dad-on sa City jail.
Ang nasampit nga mga nurse kinsa mga pulis sab, miagi og igong pagbansay sa City Health Office mahitungod sa sakto nga pagpahigayon og rapid test ug swab test.
RadyoMaN Joel Viray
