Nagsugod na ang ‘fireworks’ kun mainitong deliberasyon sa hawanan sa House of Representatives kalabutan sa merito sa impeachment complaint kontra kang embattled Supreme Court Chief Justice Maria Lourdes Sereno.
Usa sa kwestion nga hinanaling nitumaw mao ang kwestion sa partisipasyon sa mga ‘non-members’ sa House Committee on Justice ubos kang Rep. Rey Umali.
Sa iyang manifestation, hugot nga gibarugan ni minority congressman Edcel Lagman sa Albay nga ang mga kalagdaan sa camara baja nagtugot nga ang mga dili miyembro sa naasoyng komitiba angayang katugtan nga aktibong mo-partisipar ug mo-botar sa impeachment proceedings.
“What is not prohibited is (deemed) allowed,” segun sa Albay lawmaker uban sa pag-ingon nga kini nga tradisyon sa balay-balauranan gikonsidera nga proteksyon sa minority kontra sa mayoriya ug nga tipik lamang kini sa iyang gitawag nga iyang ‘inherent right’ isip usaka magbabalaud.
Agig tubag sa maong argumento, giklaro ni House Rules Committee chair Rep. Rodolfo Fariñas nga dayag usab ang mga lagda sa kongreso nga mga ‘non-members’ mamahimong motambong sa hearing apan gidid-an nga aktibong mopartisipar.
Dugang ni Fariñas nga sa pagpatuman sa usaka constitutional duty nga mobarug nga usaka impeachment body sa Sereno case, dili tinood nga walay tsansa ang mga taga-minoriya nga mo-apil sa diskusyon sanglit kining tanan isangun pa man nila ngadto sa plenary deliberations diin ang tanan mamahimong mosalmot.
Aron pag-resolba sa buruka, gipailawom sa pagbotar ang issue diin naaprobahan sa House Justice Committee members nga did-an ang mga ‘non-members’ nga taga-minority nga mo-apil apil sa nagpadayong diskusyon.
Sa boto nga 30 pabor nga did-an ug 3 lamang nga uyon sa pagpabor nga ang tanan tugtang mo-apil, nahukman sa komitiba nga kadto lamang bona fide committee members ang katugtang mosalmot sa deliberasyon.
RadyoMaN June Duterte
