Maga pulis ya precura salva el vida del un 52-año de edad mujer quien ya desman a cantoy calsada del P. Lorenzo Street del Biernes tarde pormedio de llevar conele na hospital pero ya declara conele muerto el maga doctor.
Pasada alas 5 del tarde cuando si Mariam Muntala y Uga, de Saluping, Tabuan Lasa, Basilan derepente ya desma y ya tumba serca na Mini Box Store.
Atiempo ta pasa el maga pulis quien aquel tiempo ta man patrulia ya responde na lugar despues ya sabe sila tiene quien ya tumba.
Dayun el maga pulis ya lleva entabla na hospital con Muntala pero ya declara el maga doctor del Zamboanga City Medical Center conele muerto.
Asegun na medical report, si Muntala ya muri porcausa na cardiac arrest.
Maga pulis quien ya lleva con Muntala na hospital ya entrega con el disuyu hermano si John Muntala, el dos anilio de oro y el P41,000 del disuyu defunta hermana.
