Davao City – May igong rason aron ideklara ang usaka national emergency sa tibuok nasud nunot sa padayon nga pagsaka sa ihap sa mga batan-ong babaye nga sayo nagmabdos.
Matud ni Barangay LapuLapu Agdao Sangguniang Kabataan Chairman Paulo Dominic Rodriguez, maka-alarma na ang pagtaas sa kaso sa early pregnancy karon busa uyon kini sa national emergency declaration niini sa nasud.
Alang ni Rodriguez, dili na angay paabuton sa kagamhanan nga mahurot ang mga batan-ong babaye nga mamabdusan maong sayo nga aksyon ug lakang ang gikinahanglan ang himoon sa gobyerno karon.
Segun sa SK Chairman, pinaagi lamang sa national emergency declaration makabaton og dugang gahum ang kagamhanan aron makalihok kini sa pagmugna og programa nga magsulbad sa early pregnancy sa nasud karon.
Hinoon, ang sex education, pagpatawag sa mga ginikanan ug pagsikop sa mga batan-on panahon sa kagabhion ang nakitang solusyon aron masalbar ang youth sector gikan sa kaala-otan samtang wala pa maporma ang mga programa nga magtubag sa early pregnancy problem sa Pilipinas karon.
RadyoMaN Joel Viray
