Usa ka sundalo ang patay sa nahitabong encounter tali sa rebilding New Peoples’ Army (NPA) nga sakop sa Guerilla Front Committee 19 ug 7th Special Forces Company didto sa Sitio Buringon, Brgy. Mahaba Marihatag, Surigao del Sur.
Matod pa ni Col. Rj Rojas sa 36th IB Phil. Army nga mokabat sa 30 ka mga rebilding NPA ang naingkwentro sa Special Forces samtang nagpahigayon silag combat operation sa maong lugar.
Nasayran nga gigamit sa mga rebildi ang improvised explosive device (IED) nga maoy nakaigo sa biktimang sundalo.
Giila ang napatay nga si Cpl. Jarel Digno nga sakop sa 7th Special Forces battalion.
Nasayran nga mokabat sa usa ka oras ang sinukliay sa bala nga nagsugod alas 12 ang takna sa udto ug natapos bandang alas 2 ang takna sa hapon kagahapong adlawa.
Sa pagkakaron padayon pa ang gihimung hot pursuit operation samtang pipila ka mga residenti sa lugar ang namakwit sa mga silingang barangay lakip na sa brgy. Mahaba, Marihatag Surigao del Sur.
Gihikay na sa local nga kagamhanan sa lungsod sa Marihatag, Surigao del Sur ang hinanaling ayuda ug tabang alang sa kapin 200 ka mga indibidwal nga nibakwit human sa natigayung engkwentro tali sa Special Forces battalion ug rebelding New Peoples’ Army (NPA didto sa Sitio Buringon, Brgy. Mahaba sa maong lungsod.
Gibutyag ni Gerry Campos, information officer sa LGU Marihatag nga gipalihuk na ni Mayor Raul Cubil ang opisyal sa barangay aron matumbok ang mga indibidwal nga tagaan ug hinabang.
Sa kasamtangan anaa temporaryung nagpasilong ang mga bakwit sa covered sa brgy, Mahaba.
Niapilar si Mayor Cubil sa duha ka panig nga kung adunay mahitabung engkwentro kinahanglan layu kini sa komunidad aron dili maapektohan ang mga sibilyan.
