Shabu valor de P1m

Maga pulis del Labuan Police Station ya recobri shabu valor de mas de un million de pesos desde con el un dalaguita durante el buy-bust operation na Rio Hondo del Martes por la noche.
Alas 8;50 del noche cuando ya conduci buy-bust operation el maga pulis donde ya resulta este na aresto di Saima Aliuddin y Salihuddin, alias Imah, 18 anios de edad un grade 11 y native de Kalinggalang, Sulu.
Durante el operacion, maga pulis ya confisca desde conele el 150 gramo de shabu donde este ta estima na P1,020,000 y el P1,000 marked money.
Con Aliuddin dayun ya lleva na estacion para conduci el investigacion mientras con el maga shabu ya entrega na PNP Crime Laboratory.
Maga pulis ta prepara ya el propio caso que el planta na corte contra con el suspechao.