Davao City – Buot karong imbestigahan sa Department of Trade and Industry (DTI) ang giingong pagtaas sa presyo sa isda sa mga nag-unang palengke sa syudad sa Davao gumikan sa African Swine Fever (ASF).
Sa interbyu sa DXDC RMN Davao kang Belinda Ambi, Regional Director sa DTI-XI, gibutyag niini nga ilang i-check kung unsa gyud ang hinungdan kung adunay paglihok sa presyo sa isda sa mga nag-unang palengke sa dakbayan.
“I-check pa namo kung unsay possible reason for that kay tingali’g valid pud ang ilang concern nga i-adjust ang presyo sa isda,” saysay ni Ambi.
Gisaysay ni Ambi nga sagad nagataas ang presyo sa isda kung taas usab ang demand niini apan angay nga masuta kung taas sab ang kuha niini sa supplier ug konsiderasyon sa transportasyon.
“So kung taas ang demand for isda, usually nagataas pud ang presyo. Pero there might be reasons, kanang reasonable pud nga reason nganong taas ang presyo sa isda,” saysay ni Ambi.
Samtang sa interbyu sa DXDC kang Lolita Obeñita, tindera sa Agdao public market gikumpirma niini nga aduna gayoy pagtaas sa presyo sa isda, diin gawas ASF scare aduna usay uban pang hinungdan niini.
“Taas gyud [og presyo] ang isda labi na karon nga hangin-hangin. Apil na pud nang ASF unya hapit na pud ang Holy Week,” saysay ni Obeñita.
Nasayran nga pipila ka mga konsumante ang mipadayag sa ilang oberbasyon sa pagtaas sa presyo sa isda sa mga palengke.
RadyoMaN Kirby Manzon
