Ginapaimbestigaran sa subong ni South Cotabato Governor Daisy Avance Fuentes sa pamunuan sang 27th Infantry Batallion Philippine Army ang suno pa “shadow municipal government” sang New People’s Army ukon NPA sa South Cotabato.
Suno kay Governor Fuentes ang nasambit nga shadow municipal government ang nagasakop sa nabukid nga areas sang mga barangay sa Salacafe, Basag, Mongokayo, kag Maan sa banwa sang T’boli sa diin may-yara suno pa ang mga ini kaugalingon nga mayor kag barangay kapitan.
Ang nasambit suno pa nga impormasyon ang base naman sa testimonya sang mga nagsurender nga miyembro sang NPA nga yara sa mga kamot sang 27th IB.
Nahibaluan nga sang nagligad lamang nga semana, 3 na naman ka mga miyembro sang NPA ang nagsurender lakip ang bitbit sang mga ini nga mga high powered nga mga armas luthang.
Ginkumpirmar man ni Governor Fuentes nga may panibag-o na naman nga nagluntad nga engkwentro sa tunga sang mga miyembro sang NPA kag tropa sang 27th IB Philippine Army nga nangin kabangdanan sa pagbakwit sang pipila ka residente sa bahin sang Barangay Basag.
