General Santos City—Nagpadayon pa sa kasamtangan ang gihimong imbistigasyon sa Polomolok Municipal Police Station kalabutan sa nahitabong pagpamusil sa may Purok 1-A Brgy Landan, Polomolok, South Cotabato, buntag kagahapong adlawa.
Giila ang mga biktima nga silang si Don Carl Damasco, 40, ug Jerry Congan, 53, parehong nagpuyo sa maong lugar.
Sa inisyal nga imbistigasyon sa kapulisan nasuta nga tulo ka mga lalaking sakay sa traktura maoy responsabli sa pagpamusil ngadto sa duha ka mga biktima. dugang pa nga igo ra unta silang mangape gawas sa ialng gipuy-an dihang kalit matud pa silang gipaulanan ug bala sa mga suspek.
Paspas usab nga misibat ang mga nasangpit padulong sa wala sayring lugar samtang ang duha ka mga biktima, daling gipangdala sa ospital dinhi sa Gensan human nakaangkon ug mga samad pinusilan sa lawas.
Personal grudge usa sa mga anggulong gitutukan karon sa kapulisan bahin sa maong insidenti, samtang duna na usay suspek ang kapulisan sa responsabli sa krimen.
