General Santos City—Angol ang duha ka managsuon human sa nahitabong pagpamusil sa National Highway, Sakop sa Purok 9, Barangay Sulit, Polomolok, South Cotabato alas 8:00 ang takna kaganinang buntag.
Giila ang mga biktima nga silang si Gabriel Dumago, 35 anyos; ug John Rey Dumago, 29 anyos , pulos taga Barangay Koronadal Proper, Polomolok, South Cotabato.
Subay sa inisyal nga imbistigasyon sa kapulisan sakay matud pa ang managsuon sa motorsiklo, pag abot sa national highway sakop sa Barangay Sulit, duha matud pa ka mga suspek nga sakay sa XRM kolor blue ug puti ang mitapad kanila dayon sila gipamusil pila ka higayon.
Si Gabriel nakaangkon ug samad sa iyang wala nga bahin sa tiyan ug ubos nga bahin sa iyang liog samtang si John Rey, nakaangkon ug samad sa iyang wala nga bahin sa dughan ug sa iyang tiyan nga bahin gamit ang kalibre 45 nga pistola.
Human sa pagpamusil paspas nga misibat ang mga suspek sa wala sayring lugar samtang ang mga biktima gidala sa Pagalungan Hospital, apan gibalhin sa South Cotabato Provincial Hospital human sa pila ka oras.
Away sa luna usa sa mga nanggulong gitutukan karon sa Polomolok PNP kalabutan sa maong insidenti.
